Glosari
-
A curmei
Par indicâ un mûr o une torate cun curmei.
-
Androna
Spazi al plan tiere de torate di difese, passaç, massime in corispondence dal puint jevadôr.
-
Androne
Strade strete, viuce che e passe par dut il cjistiel
-
Arc
Strument di ofese, formât di un toc di len a forme arcade che insom e da pît al à fissade une cuarde di diviers materiâi, par tirâ lis frecis.
-
Arcabûs
Arme di fûc. La peraule e ven di arc e bûs = arc sbusât; al fo il prin strument di ofese a fûc di piçul calibri.
-
Arcabusere
Buchete pal tîr cul arcabûs, formade di une vierzidure verticâl o orizontâl a retangul, strente e spaletade par dentri e di une buse circolâr disponude propit da pît o insom, o cualchi volte tal mieç, de stesse buchete.
-
Arcâl/Diurint
Trâf traviers che al ten sù lis testis di altris trâfs che no rivin a poiâsi tal mûr.
-
Arcere
Buchete verticâl par permeti il tîr cul arc.
-
Armarie
Sale dulà che si tignivin lis armis.
-
Arzin
Mutare interne in tiere, mûr, clap, len, tirade sù par difindi un incjampament. Intes difesis preistorichis furlanis, i arzins a jerin fats di grums di tiere, alts 6-8 metris, tirâts fûr dal fossâl sgjavât adôr dal arzin.
-
Balestre
Strument di ofese, formât di un arc in len o metal metût par orizontâl su par un fust in len, clamât manaçon, bon par tirâ frecis.
-
Balestrere
Buchete adate pal tîr cu la balestre, formade di une sfese orizontâl.
-
Baluart
Implant difensîf in muradure di forme semicircolâr che al rimplaçà lis toratis cjantonâls cul imponisi des armis di fûc. Cualchi volte si lu confont cun bastion.
-
Barbecjan
Costruzion avanzade, spes distacade des muris, destinade a cuvierzint pal plui il pît, par une difese basse. Al fo clamât dai romans propugnacolum, e dopo antemurale. Daspò al à cjapât il sens di mûr a scarpe, cun fin di difese ma ancje par rinfuarcî un mûr fûr plomp o clopadiç.
-
Bastide
Ripoi avanzât, semipermanent o ancje mobil. Tiermin di divignince francese, al veve il significât di oparis difensivis che a coventavin par fortificâ lûcs dulà che al jere dificil fâ sù fortificazions permanentis, o che a vevin une funzion provisorie, tant che chê di difindi i assediants.
-
Bastion
Larc teraplen dispès cuviert cuntun mûr, o ben cuntune incjamesadure, cualchi volte cun plante pentagonâl (dôs façadis, doi flancs e un canâl strent), fat sù par difindisi dai colps di artiliarie.
-
Bastion piçul
Piçul bastion taront, pal plui metût di cjanton.
-
Bearç
Toc di teren dongje di une cjase, sierât di edificis, muris, spaltadis o cisis; par latin medievâl si diseve bagartius o bayarcius.
-
Bolzon
Cualitât particolâr di frece, tirade cu la balestre a bolzon. E cjape ancje il significât di trâf par manovrâ il puint jevadôr, lant a incjastrâsi tai ingjâfs fats di pueste tes muris.
-
Borc
Grup di cjasis, une dongje di chê altre, sul imprin difindût des muris. In gjenar al jere un insiemit di cjasis di artesans, comerciants, servidôrs, oms di armis, che si disvilupave par di fûr des muris dal cjistiel e che daspò al vignive cenglât di un altri zîr di muris e di un fossâl. Si diferenzie tra borc cjistielan, borc rurâl - distint de vile, insiemit di cjasis rurâls sparniçadis e no difindudis di centis e fossâi - e borc urban.
-
Braide
Cjamp grant cenglât, pal plui - ma no simpri - dongje di une cjase. Dal langobart brait, e cfr. todesc breit = ampli.
-
Britiscje
Opare lizere prime di len e dopo di muradure, che e ven fûr dal fîl des muris, tai ponts plui impegnatîfs di difindi, come puartis, cjantons di toratis e di edificis. Sul imprin une abitazion di len, apont ae "bretone", clamade britisca, di brittus=breton. Indotadis di viertiduris, a coventavin par difindi dal alt puartis, puartei, barcons. Cuant che a jerin indotadis di bucheris, a coventavin ancje pe difese dai flancs.
-
Broili
Teren confinât, dongje de cjase dal siôr, doprât tant che ort e pai pomârs, dal galic brogilos = piçul cjamp.
-
Buchere
Sfese lungje e strente tes muris o ancje tai curmei, une vore spaletade par dentri, par fâ la vuaite e massime par doprâ armis di tîr o di fûc. No si à di confondilis cu lis buchetis pal aiar des stalis e des cjasis, cence spaletadure, che invezit e covente par podê doprâ lis armis di tîr. A son formis specifichis, tant che arcere, balestrere e arcabusere
-
Bure
Cjase in len, cjasute, casope, staipe. Chest significât al somee evident intune citazion intal at di division dal cjistiel di Strassolt Disot dal 1360, cuant che si fevele di domus seu bura. Che a fossin costruzions di len si lu capìs dal fat che i confins a jerin segnâts cul manarin sul len des "buris", come che si rimarche in chel stes document. A vuê al à il sens di segrete, curidôr strent, burete, o pûr di cjamare, cjamarute. Ancje tal toscan arcaic si cjate inte forme di burella, cul sens di curidôr soterani, preson. Al sorevîf tal toponim Bure, intal comun di Aquilee, cul significât di lûc strent, cjasute.
-
Calesele
Viute cercenade di cjasis.
-
Cancelarie
Edifici li che al lavorave e al jere a stâ il cancelîr de jurisdizion. Al jere pal plui indotât di un puarti o di une lobie.
-
Canoniere
Buchete di grandis dimensions vierte tra i curmei par permeti il tîr cun bocjis di fûc. Ancje tronere.
-
Castrum
In origjin, incjampament militâr roman prontât dai stes soldâts, cuntune forme retangolâr o cuadrade, fat sù ator di un as principâl (cardo) e di un as ortogonâl (decumanus), cenglât di un teraplen e fossâl o di un val. Sore il teraplen a tiravin sù une spaltade.
-
Cavalîr
Rialç, fat sù a cjaval de cortine, pe osservazion e pe difese
-
Celâr
Edifici pe conservazion dal vin. Par latin cellarium.
-
Cente
Zîr di muris ator di un borc rurâl o urban. In Friûl al à mantignût il significât di un zîr di muris a difese di un insediament rurâl.
-
Cise
Rie di plantis pe difese, clamade ancje Cjarande.
-
Cistierne
Element impuartant de logjistiche cjistielane, al è un dipuesit in muradure e impermeabilizât in diviersis manieris, dispès cuntune stabilidure di creps pestâts, pe raculete de aghe ploane. Che si viodi ancje tant che toponim, par esempli tal comun di Cosean, inte forme locâl di Cjiscjerne.
-
Cjamare cun fogolâr
Cjamare o sale indotade di fogolâr. In gjenar si tratave de sale plui impuartante dal palatium, che si disevii ancje caminata, che po e finì par marcâ dute la cjase dal cjistielan.
-
Cjamare cun stue
Cjamare pal plui di misure ristrete, scjaldade cuntune stue, che e podarès cjapâ ancje il significât di piçul studi. In latin medievâl stupa, stupha, tiermin che al marche sedi la stue, sedi il spazi scjaldât di chê.
-
Cjamare di jet
Camera cubicularis, la cjamare di jet dal cjistielan.
-
Cjamin/camin
Nape.
-
Cjaminade
Stradute interne, dilunc des muris dal cjistiel, par judâ lis manovris di difese e il control.
-
Cjaminade di ronde
Riplan intal spessôr des muris, parât dai curmei, dulà che si movevin lis vuardiis e i difensôrs. Se lis muris no jerin avonde gruessis, al jere un puiûl infûr di len o di altris materiâi, tignût sù di incalms e arcs o di gjocis, dulà che si rivave des toratis o di scjalis tacadis tal mûr. Par latin medievâl cursorium. Viôt ronde.
-
Cjamp
Toc di teren inte taviele, cence limitazions o caraterizazions particolârs. Il cjamp furlan al vâl 3.500 metris cuadrâts.
-
Cjanive
Edifici in gjenar di doi plans li che intai cjistiei, tes centis o tes cortinis, si tignive la robe di mangjâ: al plan tiere si conservave il vin e il vueli, mentri che il gruessam al jere intal prin plan. Par furlan e je sinonim di cantine, e e je diferenziade par latin tai documents medievâi di oreum = granâr.
-
Cjase fuarte
Cjase rurâl, contadine o dominicâl, in gjenar di bessole tal mieç de campagne, cun cualchi element fortificât (toriselis, bucheris, centis)
-
Cjasemate
Spazi cuviert, rigjavât tal spessôr des muris o daûr di chês, cun vierziduris viers l'esterni par permeti aes armis di fûc di colpî cun tîr a râs il nemì che si svicine.
-
Cjasteon
Al ven di castellum, cul significât di incjampament fortificât, forsit Castrum, o di grant complès fortificât, che al cjape dentri zîrs di muris e toratis. Al è diventât daspò toponim une vore slargjât in Italie inte stesse forme e in Friuli te forme dal plurâl Cjasteons.
-
Cjistiel
Dal latin castellum, diminutîf di castrum = incjampament fortificât. Al à il significât di cente abitabile e difindude, che e pues resisti a un assalt. Sul imprin al jere formât di une alte torate fate sù tal mieç di un slarc cenglât di un teraplen, indotât di spaltadis, e cuntun fossâl plen di aghe o un val ator ator. Daspò, al fo difindût di un o plui zîrs di muris, di diviersis toratis e di une o plui toratis di puarte. Dongje de torate al ven fat sù il Palacium o la Domus Magna, ven a stâi la abitance dal feudatari. Cuintri des muris si poin altris cjasis. Cul lâ dal timp, di fûr des muris si fasin sù altris abitazions, che daspò a saran cengladis di un altri zîr di muris. Par todesc si diferenzie Burg, cjistiel che al manten ancjemò dal dut il so aspiet di fortificazion medievâl, Schloss, cjistiel intindût tant che residence dal siôr, che dispès al à pierdût ogni riferiment a antighis funzions di difese e che in Italie al coincît cul palaç signorîl, e Ansitz, residence nobiliâr fortificade in forme lizere.
-
Cjistielat
Cjistiel in ruvine, o rescj cjistielans.
-
Cjistielîr
Fortificazion preistoriche dulà che dentri a jerin fats sù i casons pai oms e pes bestiis. Intal teren di cret (Cjars, Cjargne), i arzins a jerin alçâts cun pieris, sei lavoradis che no. Inte plane (Furlanie) lis difesis a jerin fatis di teraplens, vadì indotâts di difesis di len.
-
Cogolât
Pavimentazion fate cun cogui.
-
Coladorie/Buchete
Spazi gjavât fûr tra i incalms de spaltade a spuart, che al jere doprât pe difese dal alt, cul tîr di ogni sorte di proiets solits (claps, modons e v.i.) e licuits (aghe e vueli bulints, pês ardinte, plomp fondût, e v.i.).
-
Colombere
Torisele pai colomps. E je diferente di une torisele pe vuaite o pe difese parcè che no à buchetis o curmei, salacor sieradis inte muradure, e par vie des busis particolârs pal ricet dai colomps. Si cjate inte toponomastiche, come a Aquilee, inte forme di Colombare.
-
Cop
Cuet sgobât par taponâ i cuvierts.
-
Cordonade
Element semicircolâr che al spuarç in sens orizontâl dilunc di une torate o di une cente o di un edifici fortificât, di mût che i proiets trats a râs di abàs no rivin insom de costruzion.
-
Cordul
Element continui a spuart, metût par difûr dai parepets o dai curmei, di mût che i proietii trats di abàs no sbrissin o no sbalcin. Ancje cordonade. Al è fat di cuet o di piere, par solit cui cjantons staronzâts.
-
Cordul di protezion
Cordul ben salt tes muris cui bastions, par impedî che i proiets di artiliarie a sbalcin ator
-
Cort
Insediament rurâl fortificât o dut câs racuelt ator di un spazi sierât. Dal latin curtis.
-
Cortine
Complès di muris par difindi un borc rurâl, formât di un zîr di muris alt cinc o sîs metris e furnît di une torate di puarte, cenglât di un fossâl o di un val. Sinonim di cente. Ancje bocon di muris jenfri dôs toratis de cente.
-
Cuadrel
Frece cu la ponte di sezion cuadrangolâr.
-
Cuarp di vuardie
Spazi par dentri de puarte di jentrade indulà che si postavin lis vuardiis.
-
Curie
Tal significât roman e medievâl si intindeve une assemblee o il sît indulà che la assemblee si dave dongje. In origjin, e jere une des ripartizions dal popul roman, daspò l'edifici dulà che si cjatave il Senât. Te tarde romanitât, si intindeve il consei dal municipi, o il sît indulà che si deve adun. In documents trevisans e jere la assemblee dai vassai dal vescul. E veve ancje il sens di curtîl, place o edifici che al dave acet a lis assembleis. Chest tiermin al sorevîf par talian e par furlan cul sens di insiemit di uficis de sede vescovîl.
-
Curmel
Intindût tant che element di difese. Part di mûr rialçât par permeti ai difensôrs di parâsi e di colpî i assediants, tirant dai spazis che a dividin un curmel di chel altri. Di spessôr mancul grues a pet di chel de muradure, la schirie dai mierlis e permeteve la formazion di un cjaminament pes miliziis e pes vuardiis. I curmei dal Friûl, come te plui part de Europe, a son di forme retangolâr in plante e in prospet, cun superficie superiôr plane (curmei guelfs) o a code di sisile (curmei ghibelins). In altris areis ancje europeanis a puedin sei a trê dincj, a rose, a piramide, a semicercli, a dople ale, o ancje sutiliâts, massime pe influence rivade di Soreli Jevât. Chei no a code di sisile a àn cualchi volte une corone in piere semicilindriche o dut câs staronzade o a son taiâts de bande interne. Cuasi simpri i curmei ghibelins a àn un element carateristic in rilêf orizontâl clamât golarin, che ju cengle di dutis lis bandis. Intindût tant che element a corone de muraie di une braide. Chescj mûrs, difondûts massime dopo dal Sîscent cu la privatizazion dai bens comunâi e cu la crisi dal sisteme feudâl intes areis dal Friûl di mieç e de Alte, dulà che e jere bondance di pieris, a fasevin di confin, a fermavin l'aiar e il slacâ dal teren, a jerin une maniere di doprâ i claps che a jerin a plen tai terens, e infin, a tignivin sù lis vîts, metudis sedi de bande interne de braide, sedi tai spazis vierts tra curmel e curmel.
-
Curmeladure
Grup di curmei a difese di un mûr o di une torate.
-
Curmelon
Parepet di mûr che dal Rinassiment in ca al indiche une opare in muradure che si inframieze fra dôs canonieris o troneris. Al è diferent dal curmel par vie che al è plui grues.
-
Curtîl/Curtîf
Spazi sierât di edificis e muris, al è il cûr interni dal cjistiel.
-
Cusine
Intai documents medievâi al pâr rapresentâ un edifici a part o dut câs ben individuât, tant che al jentre come element par so cont in ats di division.
-
Difensori/Propugnacul
Element di difese acessori sedi su lis muris che denant des muris o des puartis. Al pues segnâ in mût gjeneric i curmei, o ben i riplans e lis difesis di len a spuart dai curmei e des toratis, o ben difesis di len in cjamp viert.
-
Donzon
La part plui adalt dal cjistiel, costituide o di une gruesse torate residenziâl, o dal insiemit dal torat e dal palatium. Al ven di dominonium=cjase dal siôr, che si presente ancje tes versions di donionum, domignonium, domençonum. Il tiermin si lu cjate in dute la Italie padane e alpine dal secul XII e si slargje daspò inte aree francese, dulà che al è a vuê plui vivarôs che in Italie. Intes fuartecis rinassimentâls ancje in Friûl al cjape il sens di spazi cjapât dentri intal cuarp di vuardie di une torate di puarte, tant che a Palme.
-
Fogolâr/caminet
Plan rialçât tacât de parêt e stramontât di un fumulâr che si bute inte nape. In origjin, tal palatium cjistielan e jere pal plui dome une sale indotade di fogolâr, e duncje e cjapà il non di camara caminata e dopo caminata, tiermin che daspò al fo trasferît a dute la cjase dal siôr.
-
Fogolâr/Stue
Sale indotade di fogolâr. E cjapà plui tart il sens di cjase li che al jere a stâ il cjistielan, o ben palatium.
-
Foladôr
Edifici li che si fole la ue e si fermente il most par fâ il vin. Par solit, fate sù su doi plans: il plan tiere par fâ il vin, che po si lu conservave inte cantine, e il prin plan tant che granâr. Edifici dulà che si fole la ue e dulà che si conserve il most fintremai che no si lu puarte inte cjanive.
-
For
Costruzion par cuei il pan o par fondi materiâi. E jere une struture comun intal cjistiel, che pal plui no formave ogjet di division.
-
Fossâl/Fuesse
Canâl sgjavât dulintor dal cjistiel o de cortine, tra la scarpe e la cuintriscarpe, sut o jemplât di aghe che e rive di risultivis o di flums. Sù pai cueis e sù pes monts, il fossâl o val al è cence aghe, ma lis pendencis dulintor a son un impuartant element di difese.
-
Frascjâr
Ripâr di frascjis cun funzion di tieze. Al podeve jessi un sotpuarti di frascjis e cops. Spes al jere sinonim di lobie, ven a stâi di une loze no murade, ma fate sù cun frascjiis. Laubia frascata e je atestade a Vicence tal 1050; a Bologne a metât dal Dusinte si fevele di lobie frascarum e ancje di frascata sive laubia. A Spilimberc tal 1295 i Siôrs a butavin jù i lôr documents sot de frascata in capite pontis castri. Compagn a Strassolt tal 1312, dulà che un at al jere redizût sub frascato.
-
Frate
Teren disboscât ator di une fortificazion. Dispès al jere lassât pustot di mût che a cressessin i baraçs, par difindi la fortificazion.
-
Frece
Proiet che al vignive trat cul arc, formât di une piçule aste cuntune ponte di fier e une code cun orelis par vuidâ miôr il tîr. A son diviersis cualitâts di frecis, come il veret, il cuadrel, il pilot o il pisan. Proiet tirât des balestris. Frece cun ponte semplice ma une vore spiçote.
-
Fuart
Edifici par solit furnît di bastidis e dome pe difese, cence funzions di residence o di jurisdizion.
-
Fuartece
Complès fortificât plui grant dal fuart, stant che al à casermis, dipuesits, polverieris, lozaments pai familiârs dai militârs di guarnigjon e dispès al à dentri des sôs fortificazions ancje insediaments urbans, come tal câs di Palme e Gardiscje.
-
Gatar/Fereade
Gridele di fier par difindi la lûs di puartis e barcons.
-
Gjoce/Cagnûl
Cuarp che al spuarç des muraduris, di clap o len, par tignî sù i trâfs, o pûr une britiscje o un barcon.
-
Gorne
Il canâl di piere, len, modon o metal che al ricêf la ploie racuelte de ale dal cuviert.
-
Granâr/Blavâr
Spazi o edifici pe conservazion dal gruessam. In latin medievâl horreum, oreum.
-
Incalm
Struture a sbalç fate di arcs poiâts sore di gjocis a spuart, li che si ten sù la spaltade e dulà si disponin parsore i curmei.
-
Incjamesadure
Rivestiment, pal plui di cuet ma ancje di piere, par infuarcî muraduris che a son za o par batiçâ il teraplen che al forme une bastide.
-
Incjampament
Lûc dulà che si stabilìs in mût provisori un esercit.
-
Lance di gjostre
La lungje aste di len doprade tai palis.
-
Lastrât/Cuviert di plotis
Il cuviert al podeve jessi taponât cun paie, cops o lastris di piere.
-
Lastron/Lastre
Ramade dal barcon.
-
Liminâr
Piere che e limite une puarte o un barcon.
-
Linde
Spuart dal cuviert.
-
Lize
Toc di tiere jenfri dôs paladis di difese concentrichis, dal francês antîc lice, di divignince gjermaniche
-
Loze
Edifici in comunicazion direte cul esterni di une o plui bandis, pal plui in gracie di arcadis poiadis su pilastris. Al è un element architetonic tipic dai palaçs dai siôrs, che al cjale sul curtîl plui interni. In cualchi câs al segnalave un edifici doprât par funzions publichis.
-
Luchete
Ripâr di len, tra un curmel e chel altri, par parâ il tiradôr in vuaite. Al veve la forme di un tronc di piramide, cu la base vierte sul bas. Ancje mantelute e vintiere.
-
Luminarie
Barcon sul tet, par iluminâ il spazi che al è sot e par vê acès al cuviert.
-
Lunete
Opare esterne in zonte, che e coventave tant che pont plui avanzât par protezi e prudelâ lis miliziis tes surtidis, e par colpî par daûr il nemì intant che si svicinave aes cortinis.
-
Mantelute/Mantelet
Ripâr di breons, dispès sfodrâts di bandon, poiât su ruedis o carei cu lis ruedis, par protezi i difensôrs.
-
Mine/Minere
Galarie sgjavade sot dai bastions par cirî di colpî lis muraduris.
-
Mote
Part di teren plan, sore di un rialç naturâl o artificiâl.
-
Mûr
Struture edilizie verticâl, cun funzion puartante o di division. Inte forme plurâl feminine, si intint une cente di difese citadine o cjistielane.
-
Mûr a curmel
Mûr pe difese di cjistiei, borcs e citâts o di confin e pe protezion di terens, cun sore curmei a cuadrel, che tal câs che a cenglassin braidis a podevin jessi doprâts ancje par tignî sù lis vîts.
-
Nape
Cuvierzidure di un fogolâr o di un caminet che e coventave par menâ fûr il fum inte nape.
-
Necessari
Cabôt, comut. Tal at di division dal Cjistiel di Cjaurià dal 1680 lu clamin necessari.
-
Ort
Toc di teren sierât, dongje des cjasis, doprât come ort o par plantâ pomârs. Inte Ete di Mieç al veve ancje il significât di zardin. Toc di teren doprât par meti la ortaie.
-
Palaç
Dal latin palatium, palacium, palas = edifici public. In ete langobarde e caroline al è un edifici cun funzion di centri aministratîf e juridic e, cualchi volte, di residence reâl, o di centri dulà che si racuein lis jentradis dal siôr. In gjenar e je une cjase cun plui plans, ancje se al pues indicâ ancje une cjase cuntun plan sôl. Pal plui al è sinonim di cjase, domus, mansio, solarium. Dispès si trate de cjase dal siôr.
-
Palaç fortificât
Palaç dal siôr in citât, ma ancje intai centris rurâi o avonde isolâts, fat sù ancje cuntune funzion di difese in timp di contrascj civîi o di disordins sociâi, o cuintri bandîts e brigants.
-
Palade/Spaltade
Spaltade formade di trâfs spiçâts plantâts insom dal arzin e pleade viers dal front nimì.
-
Parepet
Struture che e permet di spuarzisi di un riplan cence pericul. Al pues jessi in muradure, o fat di breis di len o di un pareman di fier. Al protezeve in particolâr lis cjaminadis di ronde.
-
Pat des scjalis
Riplan sore dai scialins di une scjale.
-
Pidulin
Piçule gjoce di indulà che al tache un volt.
-
Platee
Teraplen, o mûr bas, o scjalin tal basament de cente, par impedî aes machinis pal assedi di svicinâsi aes muris.
-
Plêf
Glesie che e à responsabilitât sore di une largje circoscrizion eclesiastiche. E da il non ancje al teritori.
-
Plombadore
Viôt Coladorie/Buchete.
-
Poç
Buse fonde intal teren, di forme par solit circolâr, sgjavade di pueste par rivâ a la aghe di falde o par racuei la aghe ploiane.
-
Ponton
Torate che e spuarç dal fîl des muris. Cualchi volte e jere di forme circolâr ma par solit e jere cuadre o pentagonâl, e e segnave, in chest câs, il pont di passaç tra la torate e la bastide.
-
Portel/Puartel
Puartute dome pai pedons che si vierzeve tes muris o in bande de puarte e dal puint jevadôr, che invezit si podeve passâ cui cjars. In chest câs il portel al jere indotât di un puint jevadôr di misure plui piçule e meût in vore di un sôl bolzon cun forcule.
-
Portele/Puartele
Piçule puarte dilunc des muris, che e lassave passâ une persone par volte, plui piçule dal poartel.
-
Porton/Puarton
Grande puarte che si vierzeve su la torate o su une abitazion impuartante. Cualchi viaç, si aministrave la justizie.
-
Preson
Spazi dulà che a sieravin i presonîrs, par solit tal plan tiere de torate principâl.
-
Puarte
Jentrade dal cjistiel, tal mûr de cente o passant par une torate di puarte. Ancje jentrade ai sengui edificis dal cjistiel.
-
Puarti
Spazi cuviert ma viert sul difûr, isolât o sot di edificis alts. Sot di un puarti si aministrave la justizie o si redizevin documents impuartants. La cancelarie e jere dispès indotade di un puarti.
-
Puint jevadôr
Puint mobil sul fossâl o val che cuant che al covente al ven tirât sù par no che il nemì si svicini ae puarte
-
Puint mobil
Puint che nol jere fis, doprât par colegâ lis toriselis di assedi aes muris dal cjistiel, o ancje par colegâ cualchi part interne de ronde.
-
Puiûl
Teracin o barconut.
-
Pustot/Pustote
Tiere bandonade e lassade a vieri, dal tiermin dât ai terens assegnâts ai contadins slâfs, clamâts dai Patriarcjis.
-
Ramade
Telâr di len dulà che e je fissade une tele imbombade di gras par fâle vignî un grum lustre, e tratade cun cere par che no passi la aghe.
-
Ristiel
Gridele di len o fier che si mandave jù di parsore par difindi une puarte.
-
Rivelin
Opare fortificade ben salde, in zonte, a forme di triangul, di retangul o a semicercli, sul devant di une puarte.
-
Ronde
Zîr di perlustrazion.
-
Scarpe
Parêt dal fossâl o mûr sgobât zontât da pît de fortificazion, cul fin di infuarcîle, di tirâ vie i cjantons vueits, di tignî lontanis lis toratis mobilis e di ridusi il pericul des minis sot tiere. Di chê altre bande de scarpe, par difûr dal fossâl, e je la cuintriscarpe
-
Scjandulis
Planelis di len o laterizi pal cuviert.
-
Scudarie
Edifici par sotetâ i cjavai. Al è un element impuartant intun cjistiel. Al ven di scudîr. Intai documents medievâi cjistielans furlans si fevele di stala ad equos, stala pro equis.
-
Scût
Arme di difese, dal latin scutum. Se plui grant, di metal e cuadrangolâr, par furlan si clame targhete.
-
Sedim
Braide tacade de cjase o teren za ocupât di une abitazion.
-
Sigjîl
Ogjet di metal o piere dure, par lassâ su la cerespagne un simbul che al marchi un document
-
Spalt
Tal imprin teraplen, tra fossâl e muris, fat par che la aghe no rosei lis fondis de cente. Plui tart, in cualchi câs, al vignì ancje chel furnît di muris. Infin al cjapà il significât di teraplen sgobât viers dal nemì, par protezi une strade cuvierzude cu la cuintriscarpe. Al sorevîf ancje tant che dât toponomastic. Par esempli, a Aquilee e je la localitât Spalt o ancje Spalit.
-
Specule
Torate di vuaite pal plui in len, par antîc cun cjampane par segnalâ il pericul. Plui tart e cjapà il sens di torate mobile pal assedi, cualchi volte indotade di un roc di vuere mobil.
-
Spêt
Arme di aste.
-
Spiçade
Difese fate di une spaltade, vadì di pâi spiçâts.
-
Spinade
Cise di baraçs, plantade ator dal fossâl.
-
Strade
Vie di comunicazion di une cierte impuartance. Intun contest cjistielan o almancul medievâl, e pues jessi ancje vie, viote, androne.
-
Stradele
Piçule strade di campagne.
-
Stramieç/Paradane
Mûr sutîl che al divît un spazi plui grant in doi spazis diviers. Al è fat di modons metûts in curtiel, di grisiolis o di breis smaltadis.
-
Stue
Implant di diviersis formis e materiâi par scjaldâ un ambient. Dal latin medievâl stupa, stupha.
-
Svuaceron
Condote di piere che si coleghe aes gornis par slontanâ la aghe plovane des muraduris.
-
Tavele
Modon sutîl pal cuviert, metût sot dai cops.
-
Telâr/Curnîs
Spieli di une puarte o di un barcon.
-
Teraç
Paviment fat di materiâl impermeabil, formât di claputs cimentâts cun cjalcine, batût e slissât.
-
Teraplen
Rialç di tiere batude o incjamesade dulà che a vevin puest lis armis pesantis
-
Torat
Ancje Mascli. E jere la costruzion plui salde, massive e protezude dal cjistiel. E ocupave par solit il centri o il cjanton mancul facil di rivâ, ma cualchi volte ancje chel plui debul. In gjenar al jere formât di une sole torate, di plui plans, che e coventave pe difese e tant che abitazion, fate di plui ambients un sore di chel altri, cun pocjis e strentis bucheris, cuntune plante cuadre, retangolâr, taronde, o pluriangolâr, dulà che si rivave in gracie di piçulis scjalinadis, gjavadis fûr intal spessôr des muris, o di scjalis internis che si podevin tirâ vie. Torate grande. E corispuint dispès cul Mascli e si disi ancje Turion.
-
Torate
Element fortificât verticâl, in gjenar plui alt dai edificis o des muris dulintor, di forme cuadrade, retangolâr, taronde, poligonâl, semicircolâr.
-
Torate de puarte
Torate sore de puarte par jentrâ tal cjistiel e parsore dal puint jevadôr.
-
Torate scudade
Torate cence la parêt interne, fate sù par che il nemì, une volte cjapât possès de torate, nol puedi parâsi par colpî i difensôrs. Ted. Schalenturm
-
Torisele/Turisele
Torate piçule, dispès tirade sù sore di une cjase fuarte.
-
Tronere
Buchetis di misuris adeguadis viertis tes muraduris par permeti di trai cun bocjis di fûc. Viôt Canoniere.
-
Val
Spaltade di pâi, plantâts dilunc dal arc che al coreve ator dal teraplen intai incjampaments romans. Daspò al cjapà ancje il significât di val sgjavât ator dal cjistiel fat sù suntun cuel o su par une mont.
-
Vie
Vie di comunicazion.
-
Vile
Insediament formât di cjasis che no son tacadis masse une dongje di chê altre, cun orts e curtîi framieç, che no son paradis cun muris o cun altris difesis, al contrari dal borc, che al jere cuasi simpri leât a un cjistiel e che al veve elements carateristics fortificâts di difese, come lis centis e i fossâi
-
Vile incjistielade/Vile centade
Grup di cjasis no tacadis une dongje di chê altre, che sul imprin al jere une vile, e che daspò al fo fortificât cuntun zîr di muris, daûr dal permès dal sovran o dut câs di une autoritât superiôr
-
Vintiere/Vintîr
Taulon mobil, che al zire su doi pivots tra un curmel e chel altri, sedi par protezi il difensôr, sedi par che il nemì no lu viodi.
-
Vuaite
Britiscje che e spuarç des muris, pe vuaite o pe difese dal alt. Daspò, torisele metude intai cjantons plui impuartants des fortificazions. Infin, e devente un lûc pal sotet des vuardiis di fûr des casermis.
-
Zardin
Teren dulà che a cressin plantis par ornament e rosis, doprât tant che lûc pal divertiment, dentri o dongje di un edifici residenziâl. Te Ete di Mieç al jere un insiemit di pomârs e di rosis. Al veve ancje non ortus.
-
Zîr des muris
Zîr des muris ator di une citât, di un cjistiel, di un borc. Se al è piçul in Friûl si disi zironut.
-
Zironut
Zîr di muris di misure minôr. Che si viodi l'at di division dal cjistiel di Strassolt Disot dal 1360.